والله ايام اول ماتنسي كلمة حلو شوية بحقها مومثل الحين
وطبعا هذي شوية ذكريات وابي اشوف واحد بس يقول ماسويت شي منها .. واذا فية معناها توه وعمره 7 سنين
تذكرون
تذكرون.. أول يوم دوام بالمدرسة كانوا يسلمونا الكتب كلهم مع بعض وصافينهم من الكبير إلى الصغير وطبعاً الكبير كتاب العلوم وكانوا يربطونهم بحبل عشان ما يطيحون مع 6 دفاترمجاناً.
تذكرون
يوم كنا نصوّر فوري عند مصوّر الجمعية وطبعاً غصباً عليك الخلفية زرقاء مب بكيفك ولازم تمشط شعرك بالمشط اللي عنده.. كله شعر.. وبعدين يغسل لك الصورة بالآلة اللي عنده أم ذراع والأطراف مشرشرة ويعطيك الصور بعد أسبوع.
تذكرون
يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت كاكاو ونتم ناكل مثله
ويا البسكوت المالح.
تذكرون
المعجون الصغير اللي ريحته تعوّر الراس ووياه عود لونه احمر وكنا نبطله بالمجلوب ونعصره ونلف العود عليه وننفخ عشان نسوي نفافيخ وطبعا ما تطلع النفاخة لين تطلع بلاعيمكم وياها.
تذكرون
تيلفون بوقرص اللي يتعب صبوعك وانته تتصل ويا ويلك يطلع الرقم مشغول لأنه ما فيه ريدايل.
تذكرون
يوم الجمعة ... نقوم من الصبح على شان نسمع أغنية في قصص الشعوب قصائص لا تنتهي
وعالم حلو بهي يسكن في القلوب في قصص الشعوب
تذكرون
يوم كنا نحط بالفريزر العصير الطويل بونصين عشان يثلج وكلما تسير تبغي تاخذه تلقى الوالدة منزلتنه تحت وما ثلّج.. يا حسرة راحت الفرحة.
تذكرون
يوم كنا نربط الشرشف على رقابنا مثل سوبرمان ونصعد فوق الكبت وانط على الدواشق وآخر شي ناقز غلط ومنكسرة إيدك.
تذكرون
يوم كنا نستقبل الحجاج من زود الفرحة واللهفة على الصوغة وآخر شي كم: مسواك وقحفيتين والكاميرا الحمراء وسيادة وللبنات قطعة خام مال الهنود وساعة.
تذكرون
يوم كانوا الأولاد يغسلون الحوش بالبروش والصابون قمة الوناسة.. يمسك البروش أونّه بيساعد وآخر شي طايح له سكيتنج على الكاشي والزولية
وفي الليل وارمة ريله.
تذكرون
أول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثوارة .... ولازم طبعاً يمر على الربع في الفريج يصيّح ويلات عليهم....ويعطيه بريك وبترول
تذكرون
يوم كنا نشوف مسرحيات الأطفال مثل السندباد والزرزور وألف باء تاء اللي فيها عبدالرحمن العقل ويوم الحرامي يكون وراه.. نصرخ من قمة راسنا: ورااااااك وراااااااك وهو يقول وينه وينه يميييييين يميييييين....
ياعيني على الاستهبال
تذكرون
عزايم قبل والسفرة المفروشة على كبر الصالة اللي على صورة ميوه (فواكه) وريحتها لازم مثل ريحة المطبخ وجالسين على الزولية اللي يوم تقوم تلقى ريلك كلها شخوط من الزولية.
تذكرون
أيام الدراسة قبل يعني يكون بنشد حيلنا بالدراسة ونشتري قلم فسفوري أصفر وإلاّ برتقالي عشان نظلل على الشي المهم وآخر شي مظللين على كل الكتاب.. وين الشي المهم؟؟ ما أدري!!!!
تذكرون
يوم يقول الأستاذ أو المعلمة ان هذي الصفحات ملغية
تعال شوف الشخابيط اللي على الصفحة من فوق لين تحت وإلاّ نطرها من الكتاب.....ليش هالحقد عاد؟
تذكرون
يوم كانت جائزة البيبسي سيارة في غطاة الغرشة كنا الظهر نسير وراء الدكان ونبطل الغراش كلها وبعدين نرد نسكرهم أي كلام تشوف الغازات كلها طايرة ومتبخرة ومستوي البيبسي ماي
تذكرون
يوم يسيرون الأولاد السوق ويّا أبوهم يشتري لهم قطع كنادير للعيد ..وآخر شي شاري طاقة كاملة نفس اللون وتشوفهم بأول يوم العيد من الوالد لين الأخو الصغير نفس لون لابسينه كلهم تقول فرقة عيالة.
تذكرون
يوم نتضارب مع ولد الجيران وتقول له: خوز عن بيتنا وعن رصيفنا..
يقول لك: مب رصيفكم هذا رصيف الحكومة
كلام منطقي, ويتم يحوس جدام البيت ويمر جدام ويقول لك ما جستك ماجستك.
تذكرون
يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووب وآخر شي منكسرة ظهورهم.
والله ايام حلوه ماكو منها .. وعلى ايامنا تلاقينا ننطر اي شي بتلفزيون حتى عالم الحيوان (( مكرمين )) متابعينة ..
ايام حكايات عالمية .. الوميض الازرق .. الاحلام الذهبية .. كبمارو .. رعد العملاق .. نينجا .....ألخ
والحين .. خوانا شنو يشوفون غير هالمسلسلات الي تخرب اكثر مما اهي تبني وكلاها مكياج وبراطم ..
والله راحت ايام خالتي قماشة .. خرج ولم يعد .. على الدنيا السلام .. (( فديتهم والله ))
اول تروح الفرع بييدك ربع دينار .. عشان تشتري خمس اشياء .. والحين اذا الولد ماراح بييده خمس دنانير مايعجبة
الحين الدنيا مالها طعم مثل اول
وادري طولت عليكم ..
يالله ناطره رايكم وعترافاتكم 
منقول
المواضيع المتشابهه
والله ذكرات ولا أحلى .. ياليتها ترجع
العرض العادي
